Show all data

• Metadata

  Old Text

  • Eterne lucis auctor omnipotens Deus manens trinus in personis et unus in substantia viam mandatorum suorum quibus regnum aditur celeste dignatus est pietate sua nobis declarare ut in ea salutiferis operum gressibus incedentes et feliciter spaciantes despecto istius caduci seculi regno letabundi celestia perveniamus ad habitacula. Ipsius itaque summi Dei prestante amminiculo ego Æthelred Anglorum basileus gratuita largitate concedo quoddam rus quatuor in se continens mansas cuidam duci qui ab huiusce patrie gnosticis Leofwine apellatur illo in loco ubi dicitur Matham in perpetue hereditatis donacione ut ipse dum vitali spiramine corporis rexerit artus sine uillius rancore securus possideat et feliciter perfruatur. Labentibus autem suorum temporum lustris habeat hoc ille nostra licencia et omnium assensu in proprie potestatis dicione cuicunque illud donare decreverit. Hoc idem rus sit ab omni servitutis jugo liberum tribus exceptis rata videlicet expedicione et municione arcis construccioneque pontium. Si quis igitur alto stomacatus felle molitus fuerit obstinato animo hanc mee liberalitatis munificenciam subvertere iniqua sit ei sors vel societas in collegio supernorum civium sed sciat cum dominus omnium arbiter venerit se ulciscentibus flammarum globis collo tenus immergendum nisi anticipando Dei clementiam salubri emendacione sufficienter emendaverit. Prefatum vero rus finibus circumcinctum in carta Ælredi manifestis exclarescit. Anno domini .mxiiii. scriptus est hic stilus his favorabilibus assensum tribuentibus quorum vocamina subtus gramulis depicta cernuntur. Ego Athelred non minus antecessoribus meis regali pollens gloria biblum hunc sub sancte crucis inpressione signatum instans corroboravi.