Show all data

• Metadata

  Old Text

  • + Oportet nos quos deus praefecit temporaliter rectores populo suo ad omnes facere iusticiam, maxime autem ad matrem nostrae salutis aecclesiam per quam Christiani facti perueniamus ad aeternam domini misericordiam qui iudicabit reges terrae, et secundum opera sua reddet unicuique. Quapropter ego Eaduuardus rex Anglorum pro uilla Fiskertuna data in Burch sancto Petro, iubeo fieri nostrae confirmationis testamentum contra omnem, scilicet, calumniam iniquorum. Hanc quippe uillam cum Leofgyua foemina Lundonica haberet omnino propriam et liberam beato Petro in praedictum locum post obitum suum donauit eam, sicut fideli testimonio nobis probatum est, perpetuo possidendam, ea scilicet plena libertate qua ipsa possidebat. Haec obiit in uia Ierosolymae, quod ubi Leofricus abbas de Burch cognouit, ad nos causam suam retulit, et per idoneos testes iustam comprobauit, nostrumque assensum inde postulauit. At regina mea Eadgy∂ cum terram uendicasset, dicendo quod hanc sibi eadem foemina decreuisset, idem abbas per me et principes meos reginae fratres Haroldum et Tostinum ipsius potentiam flexit, datisque ei in gratiam .xx. marcis auri et ornamentis aecclesiae quae ad alias .xx. marcas apportiantur, terram monasterio suo liberrimam et integerrimam restituit. Hanc igitur donationem ego rex Eaduuardus cum ipsa regina, ita annuo, concedo et confirmo, quatinus tota illa possessio Fiskertuna in aeternum sit propria et dominica ipsius sancti Petri in Burch ad usus sibi seruientium, atque ita maneat libera in terris, aquis, siluis, pratis, pascuis, cunctisque rebus et iustitiis pertinentibus, cum saca et socna, ut nullus inde quicquam repetat praeter arcis et expeditionis subsidium. Hinc ergo contestor omnes posteros meos reges et iudices per dominum omnium iudicem, iustitiae amatorem et totius iniustitiae uindicem, ne quis unquam audeat quicquam tam ex his quam de omni iure sancti Petri detrahere aut diminuere, quia re uera sicut illi consequuntur aeternam uitam qui aecclesiam dei amplificant, ita illis manent sempiterna tormenta qui eam in aliquo spoliant; qui autem haec uiolauerit, omnium sacerdotum et ministrorum dei ore anathema sit. Anno ab incarnatione domini .m.lx. confirmatum est hoc testamentum cui testes conspicui subscribendo annotantur. + Ego Eaduuardus rex constitui. + Ego Eadgy∂ regina concessi. + Ego Stigandus archiepiscopus collaudaui. + Ego Ealdredus archiepiscopus comprobaui. + Ego Wlfuuius Lincoliae antistes corroboraui. + Ego Haroldus dux faui. + Ego Tostinus dux testis fui. + Signum Raulfi regis dapiferi. + Signum Asgæri regis dapiferi. + Signum Marlesuuein. + Signum Godrici filius Eadgyfe. + Signum Ulf de Lincolia. + Signum Askyl Tokes sune. + Signum Iaulf Maltes sune.