Show all data

• Metadata

  Old Text

  • + Diuinae prospectionis qua reguntur omnia confluentia, ego Edwardus Anglicis finibus rex ac defensor constitutus, insomni animo deum inuoco, non solum regiae protectionis nomen ut non habeam, uerum etiam diuino circumuentus auxilio in dei inimicis consilio et actibus praeualeam, regnumque meum pacis quiete merear producere. Saepius enim mundi uarietas mentem meam inquietat, mouet et conturbat; en instat undique depositio legis et iustitiae; undique feruet lis et seditio; undique furit iniqua praesumptio; ius et iustitiam postponit pecunia, et haec omnia omnium nutrix malorum conflat auaritia. At nostrum est his uiriliter malis resistere; exemplum sumere de bonis; hoc est, aecclesias dei ditare, iniquis oppressos iudicibus releuare, inter potentem et humilem aequum iudicare; haec sunt in quibus delectatur deus. Hoc inspirante etiam, rogante quodam presbytero nomine Scepio, pro remedio animae meae donaui sanctae Mariae et sancto Thomae apostolo, ac sancto Olauo regi ac martyri, cui aecclesia quam terra dotaui constructa est, particulam praedii, hoc est, dimidiam uirgam et dimidium quatrentem terrae in loco Kenebiri et Lan ... dicto, eo tenore, ut amodo idem rus praedictae aecclesiae liberum ab omni censu et seruitio subiaceat, ac presbytero qui eidem praesit aecclesiae, seruiat. Hanc uero donationem ac sanctae basilicae dotationem, si quis, quod absit, infoelix praesumat euertere, sit socius Iudae, mortuus cum Annania, sepultus cum Saphira, et in bonorum resurrectione dampnatus existat, nisi in hac uita conuersus resipiscat. Anno dominicae incarnationis .m.lxiii. indictione secunda, epactaque .xviii. et concurrente secunda. Istis terminis praedicta terra circumgyratur, etc.